27 қыркүйекте Қостанай облысы Қарабалық ауданының Өрнек ауылдық округінде әкім сайлауы өтеді. Осыған орай ЖСДП Қостанай облыстық филиалының төрағасы Дамир Джаканов пен Өрнек ауылдық округі әкімдігіне кандидат, партия мүшесі Юлия Прудникова ауыл тұрғындарымен және Қарадумское орманшылығының еңбек ұжымымен кездесті.

Кездесу барысында кандидаттың сайлауалды бағдарламасы таныстырылып, ауылдық округтің әлеуметтік және инфрақұрылымдық дамуына қатысты мәселелер талқыланды. Тұрғындар абаттандыру, жергілікті инфрақұрылым және ауылда қолайлы жағдай қалыптастыру жөніндегі ұсыныстарын жеткізді.

Приречное ауылындағы кездесуде тұрғындардың күнделікті өміріне тікелей әсер ететін мәселелерге басымдық берілді. Ал Қарадумское орманшылығының қызметкерлері еңбек жағдайы мен ауылдық аумақтың дамуына қатысты өз пікірлерін білдірді. Солардың ішінде мобильді байланыстың болмауы ерекше мәселе ретінде көтерілді.

Бұл жағдай төтенше немесе жазатайым оқиға кезінде оқиға туралы жедел хабарлап, қажетті көмек шақыруды қиындатады. Әсіресе орман шаруашылығы қызметкерлері үшін тұрақты байланыстың болуы маңызды.

«Партия мен ауыл әкімі бірлесе жұмыс істей алады»

ҚОФ төрағасы Дамир Джаканов жергілікті мәселелерді шешуде тұрғындармен тұрақты байланыс орнатудың және қоғамдық ұйымдармен бірлескен жұмыстың маңыздылығын атап өтті.

«Біз Өрнек ауылына нақты мәселелерді халықтың өзінен есту үшін келіп отырмыз. Ауыл әкімі мен партияның бірлескен жұмысы арқылы бірқатар мәселелерді шешуге мүмкіндік бар деп үміттенеміз. Әрине, барлық мәселе бір күнде шешілмейді. Бірақ тұрғындардың ұсыныстарын жинақтап, оларды тиісті деңгейде көтеріп, нақты жұмыс жүргізуге болады. Біздің мақсатымыз - ауылдың мәселелерін назардан тыс қалдырмай, халықпен бірге шешу жолдарын іздеу», — деді Дамир Джаканов.

Өз кезегінде Юлия Прудникова ауылдың болашағына қатысты шешімдерді тұрғындардың пікірін ескере отырып қабылдаудың маңыздылығын атап өтті.

«Күнделікті өмірде кездесетін мәселелерді халықтың өзі жақсы біледі. Сондықтан тұрғындардың пікірін тыңдау, ұсыныстарын ескеру және оларды шешудің нақты жолдарын іздеу - менің басты ұстанымдарымның бірі», — деді кандидат.

Кездесу қорытындысында тұрғындар өздерін толғандырған сұрақтарын қойып, ұсыныстарын білдірді. Сондай-ақ оларға сайлауды өткізу тәртібі мен дауыс беру күні туралы ақпарат берілді. Өрнек ауылдық округі әкімінің сайлауы 2026 жылғы 27 қыркүйекте өтеді.

Ермуханова Гульжихан, ЖСДП Қостанай облыстық филиалының баспасөз хатшысы