2026 жылдың 28 қазанда Жалпыұлттық социал-демократиялық партиясының (ЖСДП) Жетісу облыстық филиалының ұйымдастыруымен өңірдегі инфрақұрылым мәселелеріне байланысты дөңгелек үстел өтті. Отырыс барысында жылу жүйесінің жұмысы, Текелі қаласындағы ауызсудың сапасы, коммуналдық қызметтер тарифтерінің айырмашылығы және инженерлік желілердің жағдайы талқыланды.
Жиынға филиал төрағасы Мукаманов Жасұлан Мырзахметұлы, коммуналдық шаруашылық, энергетика және табиғи монополияларды реттеу салаларының өкілдері, сондай-ақ Текелі қаласының тұрғыны Байқадамов Тілек қатысты. Кездесу барысында Жасұлан Мукаманов инфрақұрылым саласындағы өзекті мәселелерді көтеріп, тұрғындарды алаңдатып отырған сұрақтарды талқылауға назар аударды. Ауызсудың сапасы, коммуналдық қызметтердің қолжетімділігі, жылумен қамтамасыз ету және тарифтердің айырмашылығы секілді мәселелердің маңыздылығы атап өтілді.
Текелі қаласының тұрғыны Тілек Байқадамов қаладағы ауызсу сапасы, жылу және коммуналдық тарифтер төңірегінде қордаланған мәселе көп,-деді. Оның айтуынша, жаңбырлы маусымда ауызсу көзі лайланып тұрғындар ауызсуды сатып алып ішуге мәжбүр болып отырған көрінеді. «Ақыры халық ауызсуды сатып алып ішуге мәжбүр болып отыр. Сонда тұрғындар не себепті суға ақша деп қосымша ақы төлеулері керек?»,-деді.
Бұл мәселе коммуналдық қызмет сапасы мен тұрғындардың сол қызмет үшін төлейтін қаражаты арасындағы байланысты айқын көрсетеді. Тұрғындар үшін суға ақы төлеумен қатар, сапалы әрі қауіпсіз ауызсуға қол жеткізу де маңызды.
Талдықорғандағы жылу маусымына дайындық мәселесі
Дөңгелек үстел барысында «Талдықорған жылусервис» өкілі Сапиров Дидар қаланың жылу жүйесіне қатысты мәселелерге тоқталды. Қалалық инфрақұрылымды жаңарту кезінде жол жөндеу жұмыстары мен инженерлік желілердің жағдайын өзара үйлестіру қажет. Жолдар мен жылу құбырлары бір-бірімен тығыз байланысты болғандықтан, жөндеу жұмыстары кезінде жер астындағы инженерлік желілердің жай-күйін де ескеру маңызды. Жылу маусымына дайындық барысында негізгі міндеттердің бірі — қажетті жұмыстарды уақытында аяқтап, тұрғын үйлер мен әлеуметтік нысандарға жылудың уақтылы берілуін қамтамасыз ету. Бұл ретте коммуналдық кәсіпорындардың жұмысты үйлестіруі, желілердің техникалық жағдайын бақылауы және ықтимал ақаулардың алдын алуы маңызды.
Текелідегі тариф мәселесі
Кездесу барысында Текелі қаласындағы ауызсудың сапасынан бөлек су тарифтерінің айырмашылығы туралы да сөз қозғалды. Бұл тақырып бойынша Талдықорған қаласының тұрғын үй-коммуналдық шаруашылық бөлімінің маманы Азамат Кемелов түсіндірме берді. Талқылау кезінде Текелі қаласында өзен суы пайдаланылатындықтан, көктемгі және жазғы жаңбырлы кезеңдерде судың лайлануы мүмкін екені айтылды. Бұл құбылыс су көзінің табиғи ерекшеліктерімен байланысты болуы мүмкін. Дегенмен тұрғындарға жеткізілетін ауызсудың сапасы белгіленген санитариялық талаптарға сай болуы тиіс. Сондықтан тұрғындар үшін ауызсудың қауіпсіздігі мен сапасы — күнделікті өмірге тікелей әсер ететін негізгі қажеттіліктердің бірі. Сонымен қатар Текелі қаласының тұрғындары Талдықорған қаласымен салыстырғанда суға екі есе жоғары тариф төлейтіні туралы мәселе қозғалды. Тарифтер арасындағы айырмашылықтың себептерін анықтау, олардың қалыптасу тәртібін түсіндіру және коммуналдық қызметтердің қолжетімділігін қарастыру қажеттігі талқыланды.
Лас сулар мәселесі
Дөңгелек үстел барысында көшеге жайылатын лас су мәселесі де көтерілді. Мұндай жағдайлар қалалық инфрақұрылымның техникалық жағдайына қатысты сұрақтар туындатады. Су құбырларындағы ақауларды уақытында анықтау және жөндеу жұмыстарын сапалы жүргізу коммуналдық қызметтердің тұрақтылығы үшін маңызды. Ал жолдарға жайылған лас су қозғалысқа кедергі келтіріп, жол жабынының бұзылуына және санитариялық жағдайдың нашарлауына әкеліп соғары анық. Мәселені шешу үшін судың қайдан келіп жатқанын, оның ауызсу желісіне, кәріз жүйесіне немесе басқа инженерлік желіге қатысы бар-жоғын анықтау қажет. Жетісу облысының энергетика және тұрғын үй-коммуналдық шаруашылық басқармасы басшысының орынбасары Думан Қалибеков көтерілген мәселелерді толықтырды. Талқылау аясында жылу жүйесінің дайындығы, сумен жабдықтау сапасы, коммуналдық қызметтердің қолжетімділігі және инженерлік желілердің техникалық жағдайы секілді бағыттар қарастырылды. Инфрақұрылым саласындағы мәселелер бірнеше мекеменің құзыретіне қатысты болуы мүмкін. Сондықтан оларды шешуде жауапты органдардың өзара байланысы, әр мекеменің міндеттерін нақтылау және тұрғындарға түсінікті ақпарат беру маңызды. Табиғи монополияларды реттеу саласының өкілдері қатысқан кездесу тарифтерге қатысты сұрақтарды тиісті құзырет шеңберінде қарастырудың маңызын да көрсетті. Дөңгелек үстел барысында жылу маусымына дайындық, Текелі қаласындағы ауызсудың сапасы, тарифтер арасындағы айырмашылық және лас судың ағыны сынды мәселелерге назар аударылды. ЖСДП алаңында инфрақұрылым мәселелерін талқылау коммуналдық қызметтердің сапасына қатысты сұрақтарды көтеруге және сала өкілдерімен пікір алмасуға мүмкіндік береді. Мұндай кездесулердің маңыздылығы — тұрғындар үшін өзекті мәселелерді назарда ұстап, оларды шешуге бағытталған жұмыстың ашықтығы қамтылды.
🖋 ЖСДП Жетісу облыстық филиалының баспасөз қызметі